Minamasdan ko ang
Iyong paglusong at pag-ahon
Sa malamig na swimming pool
Wari’y ipinapahinga
Ang katawang napagal
Sa maghapong paroo’t parito
Para maipalimbag
Ang sinulat ng iyong mahal.
O nahilo ka marahil
Sa pagpili ng tela o papel
Para sa mga litratong tatahiin…
Minamasdan ko ang iyong pagnguya
Ng potluck na pagkain sa mesa
Hindi na natikman ice cream na dala
Na alam kong gusto ng iyong panlasa.
Pinakinggan ko ang iyong pagkanta
Ninety ang markang nakuha
Ewan ko kung kasapakat mo ang videoke
Ako mismo’y naturete…
Malamig ang pakwan na padala ni maca
Sabi mo’y kaya mong buhatin ang dalawa
Ngunit marahil pagtayo sa bus ay inaalintana
Hiniling mong iuwi ko ang isa.
Kinawayan natin ang isa’t isa
Mahigpit na yakap ay dama
Uuwi ka na, sandaling mawawala sa paningin
Ngunit tinig mo pa rin ang maririnig sa aking paggising…